أمثال مغربية

• أنا حكيت ليه من همي قنطار و هم قالي : هاك بلا عبار

• أنا اعطيت حبة وهو دار منها قبة

• أنا كنرميه بالتمر وهو كيرميني بالحجر

• أنا من حرو ندادي و هو كيقلع ف وتادي

• آش بقى من الدهاز غير المهراز

• آش خاصك أالشارف ؟ خاصني البت مولات السوالف

• آش داني لكاس البلار اللي نشرب فيه المرار

• آش قضاو حسادك الى كانو كثار أما الرزق ضامنو العزيز الجبار

• آش هاد الفهامة ياعبد الكبير تهليتي فالدلو و ردمتي البير

• آش هاد العجب الزنزون كيفتي و العمى كيكتب

• آش هذا ؟ الحمير حاركة والخيل باركة

• الله يجيب شي كصعة د الحلال و يكونو فيها الناس قلال

• الله يحفظك من المرا النواحة و البقرة الطواحة

• الله يخرجنا من دار العيب بلا عيب

• الله يرحم اللي مات و خلا المايدة عامرة بالفتات

• الله يستر،الدنيا تقلبات،ما بقيت تعرف الجمعة من السبت و الولد من البنت

• الله يقاد البصار مع العمار

• الله يلاقينا مع ما احسن منا

• الله ينجيك من الحاجبة الى خرجات و من المحسادة الى دوات

• الله ينجيك من الحالف و المحلوف و اللي جاس فوق الكدية و يشوف

• الله ينجيك من المشتاق الى داق

• الله ينجيك من شي عيالات ، ما عينهم ف الرجال عينهم غير ف الريال

• الله ينعل اللي قال كلمة و ما وفاها و تخطبات بنتو و ما عطاها و دار قصعة و ما ملاها

• الله يحفظ من هذا الزمان الغريب : النعجة ولات تخلع الذيب

• الله يهدينا حتى يدينا

29 شتنبر 2010م

********************************************

• شكون شدك ألحوت غير البحث على القوت

• الراحة بعد الخدمة راحة و الراحة بعد الراحة قباحة

• ديما يحلف و يعطي لقلبو و ناسي حسابو مع ربو

• الدار دار بونا أو العبيد بغاو يطردونا

• إلى دارها المعلم رضى الله عليها و الى دارها المتعلم ياكل العصا عليها

• لا تدوي حتى تخمم و لا تسرج حتى تلجم

• لا تحفر فوسي و تنوي تدفن خوك فساسو راه الوقيد ما يشعل حتى يحرق راسو

• شوف الزين الى ناض من نعاسو قبل يغسل وجهو ويمشط راسو

• صلاة القياد الجمعة و العياد

19 أبريل 2010 م